Håfa Adai yan Minagof Todu!

Si Yu’os ma’åse’ na un bisita ham gi este na bånda put para en tingo’ mås put I kinalamten-ña I Prugråman I Fino’ yan I Kotturan CHamoru gi Eskuelan I Dipåttamenton Idukasion Guåhan. Inestablisa este na prugråma ni’ Lai Pupbleko 14-53 ya inamenda ni’ L.P. 15-9 yan I L. P. 21-34.

I etmas takhelo’ na che’cho’-måmi I para bai in sostieni, abiba yan abånsa I lengguåhi yan kotturan CHamoru sigun i ma fa’nå’guen I famagu’on yan I estodiånte siha gi Dipåttamenton Idukasion Guåhan.

Dos na punto putfin in cheche’gue para in kumple este. I primet, i para bai in planeha yan susedi finaiche’cho’ siha para todu I siento trentai tres (139) na manma’estra/ron CHamoru put ti’orea, modu yan maneran fina’någuen lengguåhi yan kottura, mama’plånon leksion, propiu mumanehan famagu’on, mannå’i grådu. I sigundon na punto I para bai in fama’tinas lepblo yan matiriåt para uson-ñiha I mannma’estra/ro yan I famagu’on/estodiånte siha kosaki gof siña mås manmanungo’ put I fino’ CHamoru gi: Umekungok, Kumuentos, Manaitai yan Mångge gi Fino’-ta.

Sen takhelo’ na asunto este para todu I taotåo Guåhan espesiåtmente para hita ni’ manCHamoru yan kululo’ña, I Liheslaturan Guåhan sa’ ma i’ilåo mo’na I lina’la’ I lengguåhi ya kumu ti ma prutehi yan abånsa I lengguåhi yan I fino’ I mañaina-ta na siempre u falingu ya u måtai.

In saluda todu I manmembron I Mangge’helo’ Pulisihan Idukasion yan era mås i Etmas Ge’helo’ Eskuela Siha  si Siñot Erik Swanson, Sigundo Ge’helo’ Inadilånton Fina’någue yan Entraksion si Siñot Joseph M. Sanchez, Sigundo Ge’helo (Akto)’, Inayudon Indukasion yan Kuminidåt yan Inangokko yan Chagi (Akto) si Siñorå Erika Cruz, Sigundo Ge’helo’, yan Sigundo Ge’helo’ (Akto), Setbesion Atmenestratibu yan Plinanehan Gåsto si Siñot Franklin Cooper-Nurse tåtkumu siha i singko numåna’i I prugråma supotte yan ayudu para todu I che’cho’-måmi.

Saina Ma’åse’ para I palu na manatungo’-måmi na ahensia ni’ numåna’i ham supotte yan ayudu ni’ para ma na’guaha ayudu para todu I famagu’on yan manma’estra/ron CHamoru: I Ufisinan I Setbesion Ahensian Bisitan Guåhan, I Ufisinan I Inangokkon Inadahen Guåhan, I Dipåttamenton Agrikotturan Guåhan, I Ufisinan I Kåhan I Kotturan Guåhan, I Inetnon Lalahen Guahan, I Ahensian Bisitan Guahan, I Ufisinan I Maga’låhi yan I Tiñenten Maga’låhen Guåhan.

Espesiåt na agradisimento para todu I manma’estra/ron CHamoru ni’ manmama’nånague gi kuårenta (40) na eskuela siha gi uriyan Guåhan, sa’ ginen siha na si’empre u inembråsia I fino’ yan I kotturan CHamoru para I mamamaila’ na hinerasion.

Sin enbåtgo, chule’ este na åpotunidåt para en ilåo I pumalu siha na patte put para en tungo’ mås put håfa na setbisio in cheche’gue para I pupbleko hineråt. Gaige esta na in ribisa yan rinueba I nuebu na Medidan Finayen Kinapås para grådu Kattiya esta I singko grådu, I talo’ yan gi takhelo’ na grådu siha. Guaha ihemplon plånon leksion siha ni’ siña in ago’ yan na’setbe gi fina’någuen-miyu.

Ta’lo un biåhi, sen dångkolo na si Yu’os ma’åse’ na un bisita ham giya Håmi!

BIBA CHAMORU!